清文指要/经常的说

满洲语拉丁转写

sini manjurarangge majige muru tucikebi.

aibide, bi niyalmai gisurere be ulhire gojime, mini beye gisureme ohode, oron unde. gūwai adali fiyelen fiyelen i gisureme muterakū sere anggala, emu siran i duin sunja gisun, gemu sirabume muterakū. tere anggala, hono emu aldungga babi, gisurere onggolo, baibi tašaraburahū calaburahū seme, tathūnjame gelhun akū kengse lasha gisurerakū, uttu kai, mimbe adarame gisure sembi. bi inu usaka, gūnici ai hacin i taciha seme, inu ere hūman dabala, nonggibure aibi.

ere gemu sini urehekū haran, bi sinde tacibure, yaya webe seme ume bodoro, damu ucaraha ucaraha be tuwame amcatame gisure, jai bithede šungke sefu be baifi bithe hūla, manju gisun de mangga gucuse de adanafi gisure, inenggidari hūlaci, gisun ejembi, erindari gisureci, ilenggū urembi. uttu tacime ohode, manggai emu juwe aniya i sidende, ini cisui gūnin i cihai anggai ici tang sembikai, muterakū jalin geli aiseme jobombi ni.