清文指要/偶遇朋友
滿洲語拉丁轉寫[編輯]
absi yoha bihe. bi ergi emu niyamangga niyalmai boode genehe bihe. ere ildun de mini boode darifi majige teki. age si ubade tehebio. inu, jakan gurinjihe. uttu oci, musei tehengge giyanakū udu goro, saha bici aifini simbe tuwanjirakū biheo. age yabu. ai geli, mini boode kai. age wesifi teki, ubade icangga. si tuttu tehede, bi absi tembi. sain, teme jabduha. ubade emu nikere babi. booi urse aba, yaha gaju. age bi dambagu omirakū, angga furunahabi. tuttu oci, cai gana, age cai gaisu. ko, absi halhūn. halhūn oci, majige tukiyecebu. hūwanggiyarakū, mukiyebukini. je, buda tuwana, beleni bisirengge be hasa benju se. akū, age ume, bi kemuni gūwa bade geneki sembi. ainahabi, beleni bisirengge, sini jalin dagilahangge geli waka, majige jefi genecina. joo bai, emgeri sini boo be takaha kai. encu inenggi jai cohome jifi, gulhun emu inenggi gisureme teceki.