清文指要/学满洲话

维基教科书,自由的教学读本

此页面包含满文。若无法显示,请点击这里

ere afaha manju hergen baktambi. tuwame muterakūci ere afaha de dosireo.

满文[编辑]

ᠠᡤᡝ ᠰᡳᠨᡳ ᠮᠠᠨᠵᡠ ᡤᡳᠰᡠᠨ᠈ ᠠᡳ ᡧᠣᠯᠣ ᡩᡝ ᡨᠠᠴᡳᡥᠠ᠉ ᠮᡠᡩᠠᠨ ᡤᠠᡳᡵᡝᠩᡤᡝ ᠰᠠᡳᠨ ᠪᡳᠮᡝ ᡨᠣᠮᠣᡵᡥᠣᠨ᠉

ᠮᡳᠨᡳ ᠮᠠᠨᠵᡠ ᡤᡳᠰᡠᠨ ᠪᡝ ᠠᡳ ᡩᠠᠪᡠᡶᡳ ᡤᡳᠰᡠᡵᡝᡵᡝ ᠪᠠᠪᡳ᠈ ᠠᡤᡝ ᡤᠣᠰᡳᠮᡝ ᡠᡨᡨᡠ ᡩᠠᠪᠠᠯᡳ ᠮᠠᡴᡨᠠᠮᠪᡳ᠉ ᠮᡳᠨᡳ ᡝᠮᡠ ᡤᡠᠴᡠ ᡳ ᠮᠠᠨᠵᡠ ᡤᡳᠰᡠᠨ ᠰᠠᡳᠨ᠈ ᡤᡝᡨᡠᡴᡝᠨ ᠪᡳᠮᡝ ᡩᠠᠴᡠᠨ᠈ ᠮᠠᠵᡳᡤᡝ ᠨᡳᡴᠠᠨ ᠮᡠᡩᠠᠨ ᠠᡴᡡ᠈ ᡠᠮᡝᠰᡳ ᡠᡵᡝᡥᡝᠪᡳ᠈ ᡨᡠᡨᡨᡠ ᠪᡳᠮᡝ ᡧᠠᠨ ᡤᡝᠯᡳ ᡶᡝ᠈ ᡨᡝᡵᡝ ᡨᡝᠨᡳ ᠮᠠᠩᡤᠠ ᠰᡝᠴᡳ ᠣᠮᠪᡳ᠉ ᡨᡝᡵᡝ ᠰᡳᠨᠴᡳ ᠠᠨᡨᠠᡴᠠ᠉

ᠪᡳ ᠠᡩᠠᡵᠠᠮᡝ ᡳᠨᡩᡝ ᡩᡠᡳᠪᡠᠯᡝᠴᡳ ᠣᠮᠪᡳ᠈ ᡶᡠᡥᠠᠯᡳ ᡨᡝᡵᡝᡳ ᠪᠠᡴᠴᡳᠨ ᠸᠠᡴᠠ᠈ ᠠᠪᡴᠠ ᠨᠠ ᡳ ᡤᡝᠰᡝ ᡤᡳᠶᠠᠯᠠᠪᡠᡥᠠᠪᡳ᠉ ᡨᡠᡵᡤᡠᠨᡩᡝ ᠠᡳ ᠰᡝᠴᡳ᠉

ᡳᠨᡳ ᡨᠠᠴᡳᡥᠠᠩᡤᡝ ᡧᡠᠮᡳᠨ᠈ ᠪᠠᡥᠠᠨᠠᡥᠠᠩᡤᡝ ᠯᠠᠪᡩᡠ᠈ ᠪᡳᡨᡥᡝᡩᡝ ᠠᠮᡠᡵᠠᠨ᠈ ᡨᡝᡨᡝᠯᡝ ᡥᠣᠨᠣ ᠠᠩᡤᠠ ᠴᡳ ᡥᠣᡴᠣᠪᡠᡵᠠᡴᡡ ᡥᡡᠯᠠᠮᠪᡳ᠈ ᡤᠠᠯᠠ ᠴᡳ ᠠᠯᠵᠠᠪᡠᡵᠠᡴᡡ ᡨᡠᠸᠠᠮᠪᡳ᠈ ᡳᠮᠪᡝ ᠠᠮᠴᠠᡴᡳ ᠰᡝᠴᡳ᠈ ᠶᠠᡵᡤᡳᠶᠠᠨ ᡳ ᠮᠠᠩᡤᠠ᠉

ᠠᡤᡝ ᠰᡳᠨᡳ ᡝᡵᡝ ᡤᡳᠰᡠᠨ᠈ ᠮᠠᠵᡳᡤᡝ ᡨᠠᡧᠠᡵᠠᠪᡠᡥᠠᡴᡡ ᠰᡝᠮᡝᠣ᠈ ᡥᡳᠩ ᠰᡝᡵᡝ ᠣᠴᡳ᠈ ᡥᠠᡩᠠ ᡥᠠᡶᡠᠮᠪᡳ ᠰᡝᡥᡝᠪᡳ᠉ ᡨᡝᡵᡝ ᡳᠨᡠ ᡨᠠᠴᡳᡶᡳ ᠪᠠᡥᠠᠨᠠᡥᠠᠩᡤᡝ ᡩᠠᠪᠠᠯᠠ᠈ ᡠᠮᠠᡳ ᠪᠠᠨᠵᡳᡨᠠᡳ ᠪᠠᡥᠠᠨᠠᡵᠠᠩᡤᡝ ᠸᠠᡴᠠ ᡴᠠᡳ᠈ ᠮᡠᠰᡝ ᡨᡝᡩᡝ ᡳᠰᡳᡵᠠᡴᡡᠩᡤᡝ ᠶᠠ ᠪᠠ᠉ ᡳ ᠠᡳ ᡥᠠᠴᡳᠨ ᡳ ᡠᡵᡝᡥᡝ ᠪᠠᡥᠠᠨᠠᡥᠠᠩᡤᡝ ᠣᡴᡳᠨᡳ᠈ ᠮᡠᠰᡝ ᡩᠠᠮᡠ ᠮᡠᠵᡳᠯᡝᠨ ᠪᡝ ᡨᡝᠩ ᠰᡝᠮᡝ ᠵᠠᡶᠠᡶᡳ᠈ ᡤᡡᠨᡳᠨ ᡤᡳᡵᡴᡡᡶᡳ ᡨᠠᠴᡳᠴᡳ᠈ ᡠᡩᡠ ᡨᡝᡵᡝ ᡨᡝᠨ ᡩᡝ ᡳᠰᡳᠨᠠᠮᡝ ᠮᡠᡨᡝᡵᠠᡴᡡ ᠪᡳᠴᡳᠪᡝ᠈ ᡳᠨᡠ ᡠᡵᡠᠨᠠᡴᡡ ᡥᠠᠮᡳᠨᠠᠮᠪᡳᡩᡝᡵᡝ᠉

满洲语拉丁转写[编辑]

age sini manju gisun, ai šolo de taciha. mudan gairengge sain bime tomorhon.

mini manju gisun be ai dabufi gisurere babi, age gosime uttu dabali maktambi. mini emu gucu i manju gisun sain, getuken bime dacun, majige nikan mudan akū, umesi urehebi, tuttu bime šan geli fe, tere teni mangga seci ombi.

tere sinci antaka.

bi adarame inde duibuleci ombi, fuhali terei bakcin waka, abka na i gese giyalabuhabi.

turgunde ai seci.

ini tacihangge šumin, bahanahangge labdu, bithede amuran, tetele hono angga ci hokoburakū hūlambi, gala ci aljaburakū tuwambi, imbe amcaki seci, yargiyan i mangga.

age sini ere gisun, majige tašarabuhakū semeo, hing sere oci, hada hafumbi sehebi. tere inu tacifi bahanahangge dabala, umai banjitai bahanarangge waka kai, muse tede isirakūngge ya ba. i ai hacin i urehe bahanahangge okini, muse damu mujilen be teng seme jafafi, gūnin girkūfi tacici, udu tere ten de isiname muterakū bicibe, inu urunakū haminambidere.

汉语翻译[编辑]