清文指要/学满洲话
此頁面包含滿文。若無法顯示，請點擊這裡。
ere afaha manju hergen baktambi. tuwame muterakūci ere afaha de dosireo.
满文
[编辑]满洲语拉丁转写
[编辑]age sini manju gisun, ai šolo de taciha. mudan gairengge sain bime tomorhon.
mini manju gisun be ai dabufi gisurere babi, age gosime uttu dabali maktambi. mini emu gucu i manju gisun sain, getuken bime dacun, majige nikan mudan akū, umesi urehebi, tuttu bime šan geli fe, tere teni mangga seci ombi.
tere sinci antaka.
bi adarame inde duibuleci ombi, fuhali terei bakcin waka, abka na i gese giyalabuhabi.
turgunde ai seci.
ini tacihangge šumin, bahanahangge labdu, bithede amuran, tetele hono angga ci hokoburakū hūlambi, gala ci aljaburakū tuwambi, imbe amcaki seci, yargiyan i mangga.
age sini ere gisun, majige tašarabuhakū semeo, hing sere oci, hada hafumbi sehebi. tere inu tacifi bahanahangge dabala, umai banjitai bahanarangge waka kai, muse tede isirakūngge ya ba. i ai hacin i urehe bahanahangge okini, muse damu mujilen be teng seme jafafi, gūnin girkūfi tacici, udu tere ten de isiname muterakū bicibe, inu urunakū haminambidere.